Шерзат Полаттың қазасына байланысты іс бойынша сотталғандардың бірі – жасөспірім Думан Ысқақ бостандыққа шықты. Бұл туралы марқұмның отбасының адвокаты Мейірман Шекеев хабарлады.
– Думан Ысқақ бірінші сатыдағы сот үкімімен тағайындалған жазасын толық өтеген. Осыған байланысты Алматы облыстық сотының қылмыстық істер жөніндегі сот алқасы 23 шілдеде бұлтартпау шарасын жойып, оны қамаудан босатты, – деді адвокат.
Адвокаттың айтуынша, апелляциялық сот отырысы 18 тамызда Алматы қаласының сот ғимаратында өтеді.
Еске салайық, 2024 жылдың 4 қазанға қараған түні Талғар қаласында 16 жастағы Шерзат Полат қаза тапқан еді. Бұл оқиға қоғамда үлкен резонанс тудырды.
Аталған іске қатысты 2024 жылғы 5 маусымда Жетісу облысының қылмыстық істер жөніндегі мамандандырылған ауданаралық сотында үкім шықты. Судья Ержан Жанұзақов Шерзаттың өліміне қатысы бар деп танылған 9 сотталушыға үкім шығарған.
Сот шешімімен басты айыпталушы Абзал Шынасыл Қылмыстық кодекстің 99-бабы 2-бөлігі (Адам өлтіру), 293-бабы 3-бөлігі (Бұзақылық) және 24-бабы 3-бөлігі (Қылмысқа дайындалу және қылмысқа оқталу) бойынша кінәлі деп танылып, 23 жылға бас бостандығынан айырылды