Атом энергиясы агенттігінің ресми өкілі Шыңғыс Ілиясов Ресей президентінің Қазақстанға мемлекеттік сапары аясында қол қойылуы мүмкін құжаттар туралы мәлімдеді. Оның айтуынша, Владимир Путиннің сапары кезінде Қазақстан мен Ресей арасында алғашқы атом электр станциясын салуға қатысты екі үкіметаралық келісім жасалуы ықтимал. Құжаттар АЭС құрылысы мен жобаны қаржыландыру мәселелерін қамтиды.
Сонымен қатар, «Росатом» компаниясының бас директоры Алексей Лихачев Қазақстандағы алғашқы атом электр станциясының белсенді құрылысы 2027 жылы басталатынын айтты. Жоба бойынша станцияны 2030 жылдардың ортасына қарай іске қосу жоспарланған.
Лихачевтің сөзінше, энергоблоктар кезең-кезеңімен пайдалануға беріледі. Бірінші және екінші блоктардың іске қосылуы арасында шамамен 8–10 ай үзіліс болады. Оның айтуынша, негізгі мақсат – жобаны 2030 жылдардың ортасына дейін толық аяқтау.
Бұған дейін Қазақстан АЭС құрылысына қажетті қаржыландыру үшін Ресейден 13 миллиард долларға дейін несие алуы мүмкін екені хабарланған болатын. Атом энергиясы агенттігінің төрағасы Алмасадам Сәтқалиев бұл бағыттағы жұмыстар жоспарға сай жүріп жатқанын айтты. Қазіргі уақытта екі ел мемлекетаралық несие беру тетіктерін талқылап жатыр.
Жобаның нақты құны жобалау жұмыстары аяқталғаннан кейін белгілі болады. Алдын ала есеп бойынша, қуаты 1200 мегаватт болатын екі энергоблоктың құрылысы шамамен 15 миллиард долларды құрауы мүмкін. Сәтқалиевтің айтуынша, жобалау кезеңі 5–7 жылға, ал құрылыс жұмыстары 10–15 жылға созылады.
Сондай-ақ Қазақстанда Ұлттық атом холдингін құру жоспарланып отыр. Бұл ұйым елдегі барлық атом электр станцияларының иесі болып, оларды пайдалану және сервистік қызмет көрсетумен айналысады.