Ресейлік БАҚ Мәскеу мен Мәскеу облысындағы ғимараттарға жасалған дрон соққылары салдарынан төрт адам қаза тапқанын хабарлады. Ал Украина әскері бұл соққылардың мұнай нысандарына және қару-жарақ өндіретін зауытқа бағытталғанын мәлімдеді.
Мәскеу мэрі Сергей Собяниннің айтуынша, шабуыл салдарынан кем дегенде төрт адам қаза тапқан, оның үшеуі Мәскеу облысында болған. Бұқаралық ақпарат құралдарының мәліметінше, Украина Ресей астанасына соңғы бір жылдан астам уақыт ішіндегі ең ірі дрон шабуылын жасаған.
Шабуыл кезінде Мәскеу облысында Үндістан азаматы қаза тауып, тағы үш адам жараланған. Бұл ақпаратты Үндістан елшілігі растады. Дипломаттар оқиға орнына барып, ауруханадағы зардап шеккен жұмысшылармен кездескен.
Жергілікті билік Белгород облысында, яғни Украинамен шекараға жақын аймақта тағы бір адамның қаза тапқанын хабарлады. Ал Ресей Қорғаныс министрлігінің дерегінше, соңғы 24 сағат ішінде ел аумағында 1000-нан астам украин дроны атып түсірілген.
«Ресей Сыртқы істер министрлігі Мәскеу мен Мәскеу облысына жасалған жаппай дрон шабуылын “теракт” деп атады», – деп жазды РБК.
Владимир Зеленский Ресей тарапынан жасалған шабуылдардан кейінгі соққыларды «орынды» деп атады. Жұма күні ол Киевке жасалған соңғы екі күндегі ең ауқымды дрон және зымыран шабуылдарына жауап беруге уәде еткен.
Сондай-ақ Зеленский Украинаның Мәскеу маңындағы қатаң әуе қорғанысына қарамастан, шекарадан 500 шақырымнан астам қашықтықтағы нысандарға соққы жасай алғанын атап өтті.
Украина Қарулы күштерінің Бас штабы Telegram-дағы хабарламасында Мәскеу маңындағы жоғары дәлдіктегі қару-жарақ шығаратын зауытқа жасалған соққы салдарынан өрт шыққанын мәлімдеді.