Халықаралық Euronews телеарнасы Орталық Азияда алғаш рет қазақ тілінде жаңалықтар мен сұхбаттар ұсынуды бастайды. Бұл туралы Орталық коммуникациялар қызметінде өткен баспасөз мәслихатында ҚР Мәдениет және ақпарат бірінші вице-министрі Қанат Ысқақов мәлімдеді.
Оның айтуынша, бүгінде Euronews Қазақстанда орыс тілінде хабар таратады. Алдағы уақытта телеарнаның ресми интернет-платформасында қазақ тіліндегі жаңалықтар шығарылымдары мен эксклюзивті сұхбаттар жарияланады.
Сондай-ақ, Euronews Қазақстанда мемлекеттік тілдегі контентті кеңейту аясында қазақ тілінде бірнеше ірі медиажобаны жүзеге асыруды жоспарлап отыр. Бұл бастама қазақ тіліндегі халықаралық ақпараттың қолжетімділігін арттыруға бағытталған.