Каспий теңізінде әскери қызметшілер қаза тапқан қайғылы оқиғадан кейін Қорғаныс министрі Дәурен Қосанов қызметінен босатылды.
Мемлекет басшысының Жарлығымен Дәурен Жұматайұлы Қосанов Қазақстан Республикасының Қорғаныс министрі лауазымынан босатылды.
Дәурен Қосанов Қорғаныс министрі қызметіне 2025 жылғы 8 маусымда тағайындалған еді. Осылайша оның министрлік қызметі бір жылдан астам уақытқа созылды.
Дәурен Қосанов 1969 жылғы 14 қазанда Павлодар облысының Краснокут ауданындағы Новотроицкое ауылында дүниеге келген. 1990 жылы Армавир жоғары әскери авиациялық ұшқыштар училищесін, 2005 жылы Ю.А. Гагарин атындағы Әскери-әуе академиясын, 2013 жылы Ресей Федерациясы Қарулы күштері Бас штабының әскери академиясын тәмамдаған.
Әскери қызмет жолында Үшаралдағы истребительдік полкте жойғыш-ұшқыш, Талдықорған және Шымкент қалаларындағы авиациялық базалардың командирі болды. Кейін Қазақстан Республикасы Қарулы күштері Әуе қорғанысы күштерінің Әскери-әуе күштерінің қолбасшысы, Әуе қорғанысы күштері әскери институтының бастығы қызметтерін атқарды.
2022 жылғы желтоқсаннан 2024 жылғы қыркүйекке дейін Қарулы күштер Әуе қорғанысы күштерінің бас қолбасшысы қызметін атқарды. Ал 2024 жылғы қыркүйектен 2025 жылғы маусымға дейін Қорғаныс министрінің орынбасары – Әуе қорғанысы күштерінің бас қолбасшысы болды.
2024 жылы оған авиация генерал-лейтенанты әскери атағы берілді. Дәурен Қосанов I және II дәрежелі «Даңқ», II дәрежелі «Айбын» ордендерімен, «Жауынгерлік ерлігі үшін» медалімен және бірқатар мерейтойлық медальдармен марапатталған.
Қорғаныс министрі қызметіне келгенге дейін ұзақ жылдар бойы әскери авиация саласында басшылық қызметтер атқарған Дәурен Қосановтың министр ретіндегі қызметі Каспийдегі қайғылы оқиғадан кейін аяқталды.