2026 жылғы 25 тамыздан бастап Қазақстанда жүргізуші куәлігін қайтарып алу тәртібіне жаңа өзгерістер енгізіледі. Енді жүргізуші куәлігі тек сот шешімімен ғана емес, медициналық мәліметтердің болмауы немесе мас күйінде көлік жүргізуге қатысты қылмыстық істің белгілі бір негіздермен тоқтатылуы кезінде де тоқтатылуы мүмкін.
Жаңа талапқа сәйкес, 65 жастан асқан және мүгедектігі бар жүргізушілер тұрақты медициналық тексеруден өтуге міндетті. Егер мемлекеттік ақпараттық жүйеде олардың көлік басқаруға жарамдылығы немесе қарсы көрсетілімдердің жоқтығы туралы мәлімет болмаса, жүргізуші куәлігінің күші тоқтатылады.
Сонымен қатар, мас күйінде көлік жүргізгені үшін қылмыстық іс рақымшылық, ескіру мерзімінің өтуі немесе заңда көзделген өзге де негіздермен тоқтатылған азаматтар да жүргізуші куәлігінен айырылады. Бұған дейін мұндай жағдайларда іс айыптау үкімінсіз жабылуы мүмкін болса, енді бұл жүргізуші куәлігін сақтап қалуға негіз болмайды.
Жүргізуші куәлігін қайтарып алу туралы шешімді уәкілетті мемлекеттік орган қабылдап, оны цифрлық жүйеге енгізеді. Ал медициналық мәліметтердің болмауына байланысты тоқтатылған жүргізуші куәлігі азаматтың көлік жүргізуге қарсы көрсетілімдері жоқ екені туралы қорытынды жүйеге енгізілгеннен кейін қайта қалпына келтіріледі.
Ал мас күйінде көлік жүргізу ісіне байланысты жүргізу құқығынан айырылған азаматтар жүргізуші куәлігін сегіз жылдан кейін ғана қайтара алады. Ол үшін медициналық тексеруден өтіп, жол қозғалысы ережелері бойынша теориялық емтиханды қайта тапсыруы қажет болады.